Actual

Our da motivs dad üna pitschna restauraziun da l’entrada s’haja demontà üna tabla d’infuormaziun e s’ha lura scuvert ün fresco. L’istoriker Paul Grimm vaiva fingià muossà via üna jada sül quai.

 

Il fresco preschainta ad Anna Selbdritt (la Sonch‘Anna, chi ha sül schnuogl sia figlia Maria e l’uffant Gesu). Plü co facil es quist purtret gnü creà l’on 1496 d’ün pittur Talian e quai in la baselgia San Lurench da Sent.

 

In occasiun da la restauraziun da la baselgia dal 1958 as haja darcheu scuvert quist fresco e’l ravarenda refurmà da quel temp nu laiva plü til avair in sia baselgia.

 

L’istoriker d’art Erwin Poeschel ha proponü da quel temp da til distachar dal mür ed ha proponü da regalar ad üna baselgia catolica, quai cha ingüna nun ha vuglü tour. Sün initiativa da Men Rauch as haja lura pendü sü quist fresco aint il museum güst nouv inaugurà. Cun quai cha’l material da basa nun es stat tschernü optimalmaing schi ha il purtret pati ter ferm ed i larà bun savair per til restaurar. Pel mumaint es quist dad observar in l’entrada dal museum.