Exposiziun speziala

Il cuntschaint pionier da fotografias Svizer Peter Ammon, annada 1924, ha fotografà cun üna camera da purtrets gronds bler da la vita paurila in Engiadina Bassa e Val Müstair. Quai d’eira dal temp da la fundaziun dal museum, tanter 1954 e 1959. Las fotografias da format da poster e da fich buna qualità sun expostas i’l Museum Regiunal d‘Engiadina Bassa a Scuol e sun scumpartidas i’l museum in divers locals. Da la stalla fin in „Stüva da Lavin“ chi’d es bod 500 ons veglia. Qua vain documentada amo daplü la vita autentica dals abitants e da lur cultura d’abitar e da fabrichar.

I’s survain infuormaziuns sur dal fotograf, sur da la naschentscha dals purtrets, sur da legendas da las persunas fotografadas e da las chasas. Documentà vain quai in ün’intervista in ün film cun Peter Ammon. L’exposiziun es averta fin d’utuon durant las uras dal museum.