Exposiziun speziala

GIOVANNI LUZZI – TEOLOG E VISIUNARI ECUMENIC

Giovanni Luzzi, nat als 25 schner 1856 a Strada in Engiadina Bassa, es emigrà cun seis genituors in Italia ill’età da be ün on. Là ha el stübgià teologia e musica e demossà fingià bod ün talent extraordinari per linguas. Sco teolog s’ha‘l dedichà à la trducziun da la Bibla per pussibiltar als crettaivels ün meglder access à la Soncha Scrittüra.

Giovanni Luzzi d’eira da caracter avert e vaiva plaschair da contacts cun otras persunas. Uschè ha el imprais a cugnuoscher las plü diversas persunalitats importantas, quai chi til ha avert bleras nouvas portas. El vaiva artschevü il titel da docter d’honur ad Edinburgh ed a New York ha el fat la cugnuoschentscha cul president american William Taft e seis successur Woodrow Wilson.

Per pudair realisar si‘intenziun da la nouva traducziun da la Bibla in talian e‘l tuornà in Grischun, seguind ad ün invid da la corporaziun evangelica da Poschiavo, ingiò ch’el ha eir lavurà vi d‘üna nouva traducziun da la Bibla in Vallader in collavuraziun cun rav. Jachen Ulrich Gaudenz e Reto Filli.

Giovanni Luzzi es amò hoz da gronda actualità cun sia visiun centrala da l’ecumena, per üna cumünanza christiana sainza confessiuns separantas.

Cun documaints tanter oter our da l’archiv da la corporaziun evangelica da Poschiavo ed our dal Museum d’Engiadina Bassa vaiva la Galleria PGI a Poschiavo elavurà ün’exposiziun speciala sur da la vita e l’ouvra da quista persunalità extraordinaria. Il museum a Scuol tilla renda uossa accessibla a la populaziun in Engiadina Bassa, in collavuraziun cul archiv cultural d’Engiadina Bassa e la corporaziun evangelica da Scuol Tarasp.

 

 

Avertüra cun apéro: dumengia als 25 gün 2023, a las 15.00 i’l Museum d’Engiadina Bassa, Scuol.

 

Als 25 avuost 2023 seguirà ün referat da ravarenda Paolo Tognina illa baselgia da San Niclà.

 

Contact da medias: Armon Parolini, tel. 079 433 66 47 aparolini@bluewin.ch